فیلڈ مارشل سے فیلڈ مارشل تک

فیلڈ مارشل 

 ایوب خان کے دور میں پاکستان نے سعودی عرب کے ساتھ دفاعی تعلقات کی پہلی اینٹ رکھی۔ پاکستانی افسران نے سعودی کیڈٹس کو تربیت دینا شروع کیا اور پاک فضائیہ کے پائلٹ سعودی ایوی ایشن میں مددگار ثابت ہوئے۔

یہ ابتدائی اعتماد وہ بیج تھا جس نے آگے چل کر دونوں ممالک کو باہمی دفاعی معاہدہ کرنے کے قابل بنایا۔

انیس سو ستر کی دہائی: دوستی سے عسکری تعاون تک

انیس سو اکہتر کی جنگ کے بعد سعودی عرب نے پاکستان کو مالی اور سیاسی سہارا دیا، جبکہ پاکستان نے سعودی عرب کے لیے تربیتی مشنز بڑھائے۔

شاہ فیصل کی پاکستان سے قریبی وابستگی نے اس بات کو یقینی بنایا کہ دفاعی تعلقات ہمیشہ مرکزی حیثیت میں رہیں۔

انیس سو اناسی کے ایرانی انقلاب اور افغانستان پر سوویت حملے کے بعد سعودی عرب نے پاکستانی مہارت پر زیادہ انحصار کیا، جو بالآخر 2025 میں معاہدے کی صورت میں سامنے آیا۔

1980 کی دہائی: سعودی سرزمین پر پاکستانی فوج

انیس سو بیاسی میں ایک دفاعی پروٹوکول کے تحت پاکستان نے ایک ڈویژن پر مشتمل فوج سعودی عرب میں تعینات کی۔

پاکستانی فوجی اور فضائیہ کے پائلٹ سعودی عرب کی سرحدوں اور سلامتی کے محافظ بنے۔

یہ تعیناتی اس اصول کی جھلک تھی جو 2025 کے معاہدے میں تحریری طور پر شامل ہوا: پاکستان سعودی دفاع کے لیے عملی طور پر ہمیشہ تیار ہے۔

1990 کی دہائی: خلیجی جنگ اور اسٹریٹجک چھتری

نوے اکانوے میں کی خلیجی جنگ کے دوران 11 ہزار سے زائد پاکستانی فوجی سعودی عرب اور مقدس مقامات کے محافظ بنے۔

انیس سو اٹھانوے میں جب پاکستان نے ایٹمی دھماکے کیے تو سعودی عرب نے فوری طور پر پاکستان کو مالی و تیل کی سہولت دی۔ یہ عمل اس بات کی علامت تھا کہ سعودی عرب پاکستان کی ایٹمی صلاحیت کو ایک ممکنہ ڈھال سمجھتا ہے۔

ان دونوں واقعات نے یہ ثابت کیا کہ سعودی عرب اپنی سلامتی کے لیے پاکستان پر اعتماد کرتا ہے — اور یہی اعتماد 2025 میں معاہدے کی شکل اختیار کر گیا۔

2000 کی دہائی: تعاون کا ادارہ جاتی ڈھانچہ

جنرل مشرف کے دور میں دونوں ممالک کے درمیان مشترکہ دفاعی کمیٹیاں اور تربیتی سلسلے مضبوط ہوئے۔

نائن الیون کے بعد انسدادِ دہشت گردی کے میدان میں بھی تعاون بڑھا۔

ان اقدامات نے یہ دکھایا کہ دفاعی تعلقات کو مستقل بنیادوں پر ڈھانچے کی ضرورت ہے — جسے بعد میں 2025 کے معاہدے نے پورا کیا۔

دوہزار دس کی دہائی: سرحد کی وضاحت، عزم کی تجدید

2015 میں یمن جنگ کے لیے پاکستان نے فوج بھیجنے سے انکار کیا، لیکن واضح اعلان کیا کہ اگر سعودی عرب کی سرزمین کو خطرہ ہوا تو پاکستان اس کا دفاع کرے گا۔

یہ وہ ریڈ لائن تھی جو 2025 کے معاہدے میں باضابطہ طور پر شامل ہوگئی۔

دو ہزار بیس کی دہائی: تعلقات کا قانونی روپ

اگرچہ سعودی عرب اور ایران کے درمیان تعلقات بہتر بنانے میں پاکستان نے ثالثی کی، لیکن سعودی عرب کے ساتھ دفاعی تعاون کمزور نہیں ہوا۔

سترہ ستمبر 2025 — ریاض میں پاکستان اور سعودی عرب کے درمیان باہمی دفاعی معاہدہ طے پایا۔

معاہدے میں کہا گیا: “کسی ایک پر حملہ، دونوں پر حملہ تصور کیا جائے گا۔”

جو رشتہ ایوب خان کے دور میں تربیت اور نیک نیتی سے شروع ہوا تھا، جو تعیناتیوں، جنگوں اور ایٹمی اعتماد سے گزرا، وہ بالآخر ایک تحریری دفاعی معاہدے میں ڈھل گیا۔

 غیر رسمی اتحاد → باضابطہ دفاعی معاہدہ

تقریباً سات دہائیوں میں پاکستان نے بار بار یہ ثابت کیا — چاہے وہ تربیتی اکیڈمیاں ہوں، سعودی اڈے، جنگی حالات یا اسٹریٹجک بحران — کہ وہ سعودی عرب کے دفاع میں ساتھ کھڑا ہے۔ 2025 کا باہمی دفاعی معاہدہ اچانک نہیں آیا، بلکہ ایک طویل عسکری سفر کا فطری انجام تھا، جس نے روایت کو معاہدے میں بدل دیا۔

اسرائیل کا منقسم ڈھانچہ

اسرائیل کا منقسم ڈھانچہ

اسرائیل بے شک ایک ملک ہے ۔ مگر اس کے شہری گروہوں میں منقسم لوگ ہیں نہ کہ ایک قوم ۔ اسرائیلی معاشرہ سیاسی، مذہبی، معاشی ، معاشرتی اور لسانی گروہ میں بٹا ہوا ایک ملک ہے ۔ ۔ اسرائیل میں مقامی پیدا ہونے والے یہودی تقریباً 35 سے 40 فیصد ہیں۔ یورپ اور امریکہ سے آنے والے، جنہیں آشکنازی کہا جاتا ہے، تقریباً ایک تہائی ہیں۔ سابق سوویت یونین سے آنے والے قریب 15 فیصد ہیں۔مشرق وسطیٰ اور شمالی افریقہ (یعنی مزراحی یا سفاردی یہودی) تقریباً 40 سے 45 فیصد ہیں۔ایتھوپیا سے آنے والے یہودی تقریباً دو فیصد کے قریب ہیں۔

یہ لوگ کہاں اور کیسے آباد ہوتے ہیں

ابتدا میں حکومت نے نئے آنے والوں کو مخصوص بستیوں اور شہروں میں آباد کیا، اس وجہ سے ایک ہی خطے سے آنے والے لوگ اکٹھے رہنے لگے۔ بعد میں زبان اور ثقافت کی بنیاد پر بھی محلّے اور ہمسایہ داریاں بن گئیں۔

مختلف خطوں کے لوگ کیسے ہیں

سوویت یونین سے آنے والے زیادہ تر تعلیم یافتہ اور فنی مہارت رکھنے والے تھے، وقت کے ساتھ انہوں نے اچھی ترقی کی۔یورپ اور امریکہ سے آنے والے نسبتاً خوشحال اور آزاد خیال لوگ ہیں۔مشرق وسطیٰ اور شمالی افریقہ سے آنے والے لوگ زیادہ روایتی ہیں، خاندان اور مذہبی اقدار کو اہمیت دیتے ہیں۔

ایتھوپیا سے آنے والے لوگ کم وسائل کے باوجود اپنی ثقافت اور زبان کو گھروں میں زندہ رکھے ہوئے ہیں۔

گھروں میں کون سی زبان بولی جاتی ہے

روسی بولنے والے اپنے گھروں میں روسی بولتے ہیں۔ایتھوپیا سے آنے والے امہاری یا تیگرینیا بولتے ہیں۔عرب اور دروز گھرانوں میں عربی رائج ہے۔

لیکن باہر کے معاملات، تعلیم اور ملازمت میں عبرانی ہی سب سے زیادہ بولی جاتی ہے۔

اسرائیل میں کس کو برتر سمجھا جاتا ہے

اسرائیل کے شروع کے زمانے میں یورپ اور امریکہ سے آنے والے یہودی، یعنی آشکنازی، تعلیم اور حکومت کے بڑے عہدوں پر زیادہ نظر آتے تھے۔ اس وجہ سے انہیں برتر طبقہ سمجھا گیا۔ وقت کے ساتھ دوسرے گروہ بھی اوپر آئے، لیکن معاشی اور تعلیمی فرق وقت کے ساتھ بڑھا ہے۔

سیاست میں کس گروہ کا زور ہے

ابتدا میں یورپی نژاد یہودی سیاست میں سب سے آگے تھے اور زیادہ تر بائیں بازو کی جماعتوں کے ساتھ جڑے رہے۔ بعد میں مشرقی اور شمالی افریقہ کے یہودیوں نے دائیں بازو کی جماعتوں کو اپنی طاقت بنایا اور سیاست میں بڑی قوت حاصل کی۔ آج سیاست میں مختلف گروہ شریک ہیں لیکن مزراحی یہودی ووٹوں کی بڑی طاقت سمجھے جاتے ہیں۔اس ؑعنصر نے معاشرے میں انمٹ مسابقت پیدا کر دی ہے

فوج میں زیادہ کون ہیں

اسرائیل میں یہودی نوجوانوں کے لیے فوجی خدمت لازمی ہے، اس لیے سب سے زیادہ نمائندگی یہودیوں کی ہی ہے۔ اس کے علاوہ دروز کمیونٹی کے مرد سب سے زیادہ فوج میں شامل ہوتے ہیں اور اونچے عہدوں تک پہنچے ہیں۔ بدو بھی بعض خاص یونٹوں میں بڑی تعداد میں پائے جاتے ہیں۔ الٹرا آرتھوڈوکس یہودی فوج میں کم شریک ہوتے ہیں۔دروز عنصر البتہ اس قدر غالب ہے کہ فوج کے اندر ان کی رضامندی لازمی مانی جاتی ہے

کس گروہ کی معیشت مضبوط ہے

یورپی اور امریکی نژاد یہودی شروع سے ہی تعلیم اور سرمایہ رکھنے کی وجہ سے زیادہ خوشحال ہیں۔ امریکہ اور یورپ سے آنے والے بہت سے خاندان معاشی طور پر جلدی اوپر چلے گئے۔ سوویت یونین سے آنے والے ابتدا میں مشکل میں تھے مگر وقت کے ساتھ بہتر ہو گئے۔ مشرقی اور شمالی افریقہ کے لوگ اور ایتھوپین یہودی معاشی لحاظ سے اب بھی پچھڑے ہوئے سمجھے جاتے ہیں۔

اسرائیل کہنے کو یہودی مزہبی ملک ہے مگر اندر سے ملک سیاسی، معاشرتی، معاشی، اخلاقی ہی نہیں سیاسی طور پر پر بھی ایک منقسم معاشرہ ہے ۔ جس کو پرپیگنڈے، سرمائے اور ظلم نے جوڑ کے رکھا ہوا ہے۔

صغیرہ کبیہرہ

 

حضرت موسی علیہ السلام نے ایک مرتبہ اللہ تعالی سے پوچھا

یا اللہ میری امت کا سب سے بدترین شخص کون سا ھے؟

اللہ تعالی نے فرمایا !

کل صبح جو شخص تمھیں سب سے پہلے نظر آئے وہ آپ کی امت کا بد ترین انسان ھے

حضرت موسی علیہ السلام صبح جیسے ہی گھر سے باہر تشریف لائے

ایک شخص اپنے بیٹے کو کندھے پر بٹھائے ھوئے گزرا

حضرت موسی علیہ السلام نے دل میں سوچا

اچھا تو یہ ھے میری امت کا سب سے برا انسان

پھر آپ اللہ تعالی سے مخاطب ھوئے اور کہا

یا اللہ !

میری امت کا سب سے اچھا انسان کون سا ھے اسے دکھائیں

اللہ تعالی نے فرمایا !

شام کو جو شخص سب سے پہلے آپ سے ملے وہ آپکی امت کا سب سے بہترین انسان ھے

حضرت موسی علیہ السلام شام کو انتظار کرنے لگے کہ

اچانک انکی نظر صبح والے بد ترین انسان پر پڑی

یہ وہی شخص جو صبح ملا تھا

حضرت موسی علیہ السلام نے اللہ سے کلام کیا

یا اللہ یا رب کریم

یہ کیا ماجرہ ھے

جو شخص بدترین تھا وہی سب سے بہترین

کیسے ھوسکتا ھے ؟

اللہ تعالی نے فرمایا !

صبح جب یہ شخص اپنے بیٹے کو کندھے پر بٹھائے جنگل کی طرف نکلا تو اس کے بیٹے نے اس سے پوچھا

ابا کیا اس جنگل سے بڑی کوئی چیز ھے

اس نے کہا

ہاں بیٹا

یہ پہاڑ جنگل سے بھی بڑے ہیں

بیٹا بولا

ابا ان پہاڑوں سے بھی بڑی کوئی شئے ھے

وہ بولا

ہاں بیا

یہ آسمان پہاڑوں سے بھی بہت بڑا بہت وسیع و عریض ھے

بیٹے نے کہا

ابا اس آسمان سے بڑی بھی کوئی چیز ھے

باپ نے ایک سرد آہ بھری اور دکھ بھری آواز میں بولا

ہاں بیٹا اس آسمان سے بھی بڑے تیرے باپ کے گناہ ہیں

بیٹے نے کہا

ابا ! تیرے گناہ سے بڑی بھی کوئی چیز ھے

باپ کے چہرے پر ایک چمک سی اگئی اور بولا

ہاں بیٹا

تیرے باپ کے گناھوں سے بہت بہت بڑی

میرے رب کی رحمت اور اسکی مغفرت ھے

اللہ رب العزت نے فرمایا

اے موسی ! مجھے اس شخص کا اعتراف گناہ اور ندامت اس قدر پسند آیا کہ

میں نے اس بدترین شخص کو تیری امت کا بہترین انسان بنا دیا

میں نے اسکے تمام گناہ ناصرف معاف کر دئیے بلکہ

گناھوں کو نیکیوں سے بدل دیا

لنگڑے جنگجو اور سپہ سالار

تاریخ میں کئی عظیم جنگجو ایسے بھی گزرے ہیں جو کسی جسمانی معذوری، خاص طور پر لنگڑا پن (عرج یا پاؤں کا نقص) کے باوجود عظیم ترین سپہ سالار، فاتح، یا بہادر جنگجو بنے۔ ان کا عزم، قیادت اور بہادری جسمانی نقص سے کہیں زیادہ بلند تھی۔

یہاں لنگڑے (عرج والے) مشہور جنگجوؤں کے چند نام دیے جا رہے ہیں:

1. حضرت عمرو بن الجموحؓ — صحابی رسول ﷺ

مدینہ کے معزز صحابی، پاؤں میں شدید لنگڑا پن تھا (عرج)

غزوہ اُحد میں شرکت کے لیے بار بار اصرار کیا، حالانکہ بیٹے اور اہلِ خانہ منع کرتے تھے

رسول اکرم ﷺ نے ان کی دلیری دیکھ کر اجازت دی

شہادت کے بعد فرمایا گیا:

"میں نے عمرو بن الجموح کو جنت میں لنگڑاتے ہوئے نہیں بلکہ دوڑتے ہوئے دیکھا ہے!"

 تمور لنگ  یا  — ترک-منگول فاتح

اصل نام: تیمور گرگانی

پاؤں میں شدید زخم کی وجہ سے ہمیشہ کے لیے لنگڑا ہو گیا

اسی نسبت سے تاریخ میں "لنگ" (لنگڑا) کہلایا

وسطی ایشیا، ایران، عراق، ہندوستان اور شام تک فتوحات کیں

سمرقند کو عظیم دارالحکومت بنایا

اپنے وقت کا سب سے خوفناک اور چالاک جنگجو و حکمران

 فلپ آف میسیڈون — سکندر اعظم کا والد

ایک آنکھ ضائع اور ایک ٹانگ زخمی ہو گئی تھی

میدان جنگ میں زخمی ہو کر بھی جنگ جاری رکھی

مقدونیہ کو عظیم سلطنت میں تبدیل کیا

سکندر اعظم کی عسکری تربیت کا اصل معمار

 الپ ارسلان — سلجوقی سلطان

روایات کے مطابق جنگ میں زخمی ہو کر ٹانگ پر اثر آیا

بازنطینیوں کے خلاف ملاذکرد کی جنگ میں تاریخی فتح حاصل کی

اس کی قیادت میں سلجوق سلطنت نے عظیم وسعت پائی

5. شیخ عدی بن مسافر — یزیدی فرقے کے بزرگ

بعض روایات کے مطابق ان کی چال میں لنگ تھا، مگر قیادت اور روحانی طاقت میں بہت بلند مقام رکھتے تھے

جسمانی نقص یا معذوری کبھی بھی عزم، قیادت یا بہادری میں رکاوٹ نہیں بنتی۔

ان تاریخی شخصیات نے یہ ثابت کیا کہ دل، دماغ اور یقین کی طاقت جسمانی حدود سے زیادہ اہم ہے۔

ابن سیرینؒ — خوابوں کا عالم، سچائی کا چراغ

 ابن سیرینؒ — خوابوں کا عالم، سچائی کا چراغ

کسی بھی معاشرے میں علم کی روشنی بکھیرنے والے لوگ صدیوں بعد پیدا ہوتے ہیں۔ ایسے ہی ایک درخشاں ستارے کا نام ہے محمد بن سیرینؒ، جنہیں دنیا آج بھی علمِ تعبیرِ خواب کا امام مانتی ہے۔ ان کی شخصیت محض خوابوں کی تعبیر تک محدود نہیں تھی، بلکہ ان کی زندگی علم، تقویٰ، دیانت اور سچائی کی لازوال مثال تھی۔

ابن سیرینؒ کا اصل نام محمد بن سیرین تھا۔ ان کی پیدائش 33 ہجری میں عراق کے مشہور شہر بصرہ میں ہوئی۔ ان کے والد سیرینؒ حضرت انس بن مالکؓ کے آزاد کردہ غلام تھے، جو نبی کریم صلی اللہ علیہ وسلم کے خادم خاص  ہے۔ اس نسبت نے ابن سیرینؒ کے گھرانے کو دین و علم کی خوشبو سے معطر رکھا۔

ان کی والدہ ایک نیک، عبادت گزار اور متقی خاتون تھیں۔ ایسی پرورش میں ابن سیرینؒ کی شخصیت میں دیانت، سچائی، علم اور حلم کی بنیاد بچپن ہی سے رکھ دی گئی تھی۔

ابن سیرینؒ نے ابتدائی تعلیم بصرہ میں حاصل کی، مگر ان کا دل علم کی پیاس بجھانے کو مزید بڑے علماء اور صحابہ کرامؓ کی تلاش میں لگا رہا۔ انہوں نے دورِ تابعین میں ایسے جلیل القدر صحابہ کرام سے براہِ راست فیض حاصل کیا جن کے علم اور عمل کی دنیا معترف ہے، جیسے:

حضرت انس بن مالکؓ

حضرت ابن عباسؓ

حضرت عبداللہ بن عمرؓ

حضرت ابوہریرہؓ

ابن سیرینؒ نے صرف حدیث و فقہ ہی نہیں، بلکہ اخلاقیات، زہد و تقویٰ اور معاشرتی اصلاح میں بھی نمایاں مقام حاصل کیا۔

اگر ابن سیرینؒ کا نام لیا جائے تو سب سے پہلا حوالہ علمِ تعبیرِ خواب کا ذہن میں آتا ہے۔ انہوں نے اس علم میں ایسی مہارت حاصل کی جو صدیوں میں کسی کو نصیب ہوتی ہے۔ ان کی تعبیریں صرف خواب کی ظاہری شکل پر مبنی نہ تھیں، بلکہ وہ انسان کی شخصیت، نیت، حالات اور وقت کو مدنظر رکھتے تھے۔

مشہور کتاب "تعبیر الرؤیا" میں منسوب ان کی تعبیریں آج بھی دنیا بھر میں حوالہ مانی جاتی ہیں۔ ان کا یہ علم صرف ظاہری بصیرت نہیں بلکہ دینی فہم، قرآن، حدیث اور حضرت یوسفؑ کے علم تعبیر کی عملی مثال ہے۔

ابن سیرینؒ کی زندگی زہد، عبادت اور تقویٰ سے بھرپور تھی۔ وہ سچ بولنے، وعدہ نبھانے اور امانت داری میں بے مثال تھے۔ ایک واقعہ مشہور ہے کہ انہوں نے کسی کا مال بطور امانت لیا، بعد میں اس مال کی واپسی میں رکاوٹ آئی، حتیٰ کہ ابن سیرینؒ کو قید کی صعوبتیں برداشت کرنا پڑیں، مگر انہوں نے امانت میں خیانت نہ کی۔

وہ کاروبار بھی کرتے تھے، مگر ان کے کاروبار کی بنیاد دیانت اور اللہ پر توکل تھی۔ ناپ تول میں کمی، دھوکہ، جھوٹ یا فریب سے انہیں سخت نفرت تھی۔

ابن سیرینؒ دن کو علم میں مصروف رہتے، راتوں کو عبادت میں مگن رہتے تھے۔ وہ دنیا کی زیب و زینت سے زیادہ آخرت کی تیاری کو اہم سمجھتے تھے۔ ان کے تقویٰ اور عاجزی کی یہ حالت تھی کہ ان کی محفل میں بیٹھنے والے دین اور علم کی خوشبو میں ڈوب جاتے تھے۔

ابن سیرینؒ کا ایک قول آج بھی ہمارے لیے مشعلِ راہ ہے:

"جو شخص اپنے وعدے کا پاس نہیں رکھتا، وہ ایمان کے دائرے سے باہر جا سکتا ہے۔"

انہوں نے ہمیشہ سچ، دیانت اور علم کی تلقین کی اور کہا کہ خواب کی تعبیر دینا کھیل نہیں بلکہ علم، تقویٰ اور فہم کا امتحان ہے۔

ابن سیرینؒ کی وفات 110 ہجری میں بصرہ میں ہوئی۔ ان کی وفات علم، تقویٰ اور حکمت کی دنیا میں ایک بڑا خلا چھوڑ گئی۔ مگر آج بھی دنیا بھر میں ان کی تعبیریں، اقوال اور کردار زندہ ہیں۔