اسرائیل کی نئی دھمکی

اسراہیل کی نئی دھمکی

دنیا میں جب جنگ چھڑتی ہے تو اصول، اخلاقیات اور عالمی قوانین سب خواب بن کر رہ جاتے ہیں۔ مشرقِ وسطیٰ اس وقت اسی صورتحال کا شکار ہے۔ ہر گزرتے دن کے ساتھ خطے میں جاری کشیدگی نئے سنگین حقائق کو جنم دے رہی ہے۔ تازہ ترین اور حیران کن انکشاف اسرائیل کے وزیرِ دفاع اسرائیل کاتز نے کیا ہے، جنہوں نے اعتراف کیا کہ حالیہ ایران اسرائیل کشیدگی کے دوران اسرائیل نے ایرانی رہبرِ اعلیٰ آیت اللہ علی خامنہ ای کو قتل کرنے کا منصوبہ بنایا تھا۔

اسرائیلی وزیرِ دفاع کے مطابق، 13 جون سے 25 جون 2025 کے دوران جاری بارہ روزہ جنگ میں اسرائیل کی اولین ترجیح ایرانی قیادت کو کمزور کرنا اور فیصلہ کن وار کرنا تھا۔ کاتز نے کھلے الفاظ میں کہا کہ "اگر خامنہ ای ہمارے نشانے پر آ جاتے، تو ہم انہیں ختم کر دیتے۔" لیکن اسرائیلی انٹیلی جنس اور فوج اس وقت حیران رہ گئی جب خامنہ ای زیرِ زمین چلے گئے اور اپنے تمام اہم کمانڈرز اور مشیروں سے رابطے مکمل طور پر منقطع کر دیے۔

یہ پہلا موقع ہے کہ اسرائیل کی اعلیٰ قیادت نے کھلے عام تسلیم کیا کہ جنگ کے دوران ایران کے سپریم لیڈر کو قتل کرنا ان کے ایجنڈے کا حصہ تھا۔ مغربی دنیا اور اسرائیل بظاہر "ریاستی قتل" کو مسترد کرتے ہیں، لیکن جب ان کے اپنے مفادات خطرے میں پڑتے ہیں تو تمام عالمی اصول اور اخلاقیات کو نظرانداز کر دیا جاتا ہے۔

کاتز نے واضح طور پر کہا کہ اسرائیل کو ایسی کارروائیوں کے لیے امریکہ یا کسی اور سے اجازت لینے کی ضرورت نہیں۔ انہوں نے یہ بھی کہا کہ اگر ایران اپنے جوہری پروگرام میں پیش رفت کرتا ہے تو اسرائیل کو "گرین سگنل" حاصل ہے کہ وہ دوبارہ کارروائی کرے۔

یہ سب کچھ ایسے وقت میں کہا جا رہا ہے جب امریکہ کی ثالثی میں ہونے والی جنگ بندی کو محض چند دن گزرے ہیں۔ ایک طرف اسرائیل خود کو مظلوم ظاہر کرتا ہے، دوسری جانب اس کے وزیرِ دفاع کھلے عام دوسرے ملک کے سربراہ کو قتل کرنے کا اعتراف کرتے ہیں۔

کاتز نے طنزیہ انداز میں خبردار کیا کہ خامنہ ای کو زیرِ زمین رہنے میں ہی بہتری ہے، جیسا کہ حزب اللہ کے سربراہ حسن نصراللہ برسوں سے چھپ کر زندگی گزار رہے ہیں۔

حقیقت یہ ہے کہ مشرقِ وسطیٰ میں ایران اور اسرائیل کے درمیان جاری جنگ محض میزائلوں اور ڈرونز تک محدود نہیں رہی، بلکہ اب قیادت کی سطح تک جا پہنچی ہے۔ سوال یہ ہے کہ اگر آئندہ ایسی کوئی کارروائی کامیاب ہو جاتی ہے تو خطے میں طاقت کا توازن مکمل طور پر بگڑ جائے گا اور دنیا کو اس کے خوفناک نتائج بھگتنا پڑیں گے۔

ایران نے اس اعتراف پر باضابطہ ردِعمل نہیں دیا، لیکن بظاہر تہران خاموش رہ کر اس سازش کو نظرانداز نہیں کرے گا۔ موجودہ صورتحال کے پیش نظر مشرقِ وسطیٰ کے دن مزید خطرناک اور غیر یقینی دکھائی دے رہے ہیں۔

اب دیکھنا یہ ہے کہ اقوامِ متحدہ، امریکہ اور یورپی طاقتیں اس کھلے اعتراف پر کیا ردِعمل دیتی ہیں یا ہمیشہ کی طرح خاموش تماشائی بنی رہتی ہیں۔ لیکن اتنا طے ہے کہ جب ایک ریاست خود دوسرے ملک کی اعلیٰ قیادت کو قتل کرنے کی منصوبہ بندی کرے اور اس کا کھلے عام اعتراف بھی کرے تو عالمی امن صرف ایک دکھاوا بن کر رہ جاتا ہے

یادگار سال - 1979

کہتے ہیں بعض سال تاریخ میں صرف کیلنڈر بدلنے کے لیے نہیں آتے، وہ نسلوں کی قسمت اور قوموں کا مستقبل بدل دیتے ہیں۔ انیس سو اناسی (1979) بھی ایسا ہی سال تھا۔ اس سال مشرقِ وسطیٰ سے لے کر ایشیا تک زمین ہلی، تخت الٹے، معاہدے ہوئے، جنگوں کی بنیاد پڑی اور کئی ایسی چنگاریاں سلگیں جو آج دہائیوں بعد بھی شعلوں کی صورت میں بھڑک رہی ہیں۔

چند لمحے رک کر سوچیں، کیا آپ کو معلوم ہے 1979 میں ایران میں بادشاہت کا خاتمہ ہوا، افغانستان پر دنیا کی سپر پاور سوویت یونین نے لشکر کشی کی، مصر نے اسرائیل کو تسلیم کیا، پاکستان میں مذہبی شدت پسندی کی بنیاد پڑی اور چین نے اپنی معیشت دنیا کے لیے کھول دی؟

جی ہاں، یہ سب ایک ہی سال میں ہوا اور یہی وہ واقعات ہیں جن کے اثرات آج بھی ہماری سیاست، معیشت اور سلامتی پر سایہ کیے ہوئے ہیں۔

ایران کا انقلاب 

فروری 1979 میں ایران میں آیت اللہ خمینی کی قیادت میں انقلاب برپا ہوا، بادشاہت کا تختہ الٹ دیا گیا، امریکہ کا قریبی اتحادی ایران ہاتھ سے نکل گیا اور دنیا میں ایک اسلامی نظریاتی ریاست اُبھری۔

کس کو فائدہ ہوا؟ ایران کی مذہبی قیادت کو۔ انہیں نہ صرف اقتدار ملا بلکہ شیعہ اسلام کو عالمی سطح پر ایک سیاسی طاقت کے طور پر منوانے کا موقع ملا۔

کس کو نقصان ہوا؟ امریکہ کو، جس کا مشرقِ وسطیٰ میں ایک مضبوط اتحادی کھو گیا۔ شاہ ایران کو، جنہیں ملک چھوڑنا پڑا۔ سعودی عرب اور خلیجی ریاستوں کو، جنہیں ایران کے بڑھتے اثرات سے شدید خطرہ محسوس ہوا۔

افغان جہاد 

دسمبر 1979 میں سوویت یونین کی افواج افغانستان میں داخل ہوئیں۔ ان کے خیال میں یہ ایک چھوٹا سا فوجی آپریشن ہوگا، مگر یہ جنگ دس سال چلی اور سوویت یونین کی تباہی کی بنیاد بن گئی۔

فائدہ کس کو ہوا؟ امریکہ اور مغربی طاقتوں کو، جنہوں نے بغیر براہِ راست لڑے سوویت یونین کو کمزور کیا۔ پاکستان کو وقتی طور پر فائدہ ہوا، عالمی امداد ملی، اسٹریٹجک اہمیت بڑھی۔

نقصان کس کا ہوا؟ افغان عوام کا، جن کا ملک برباد ہوا، لاکھوں مہاجر بنے، ہزاروں مارے گئے۔ خود پاکستان بھی مہاجرین، اسلحہ، منشیات اور شدت پسندی کی دلدل میں اتر گیا۔

مصر-اسرائیل معاہدہ 

مارچ 1979 میں مصر نے اسرائیل کو تسلیم کر کے نہ صرف اپنا مقبوضہ علاقہ واپس لیا بلکہ مغربی دنیا کی نظر میں خود کو "امن پسند" ثابت کیا۔

فائدہ کس کا؟ اسرائیل کا، جو عرب دنیا میں سفارتی تنہائی سے نکلا۔ امریکہ کا، جس نے مشرقِ وسطیٰ میں اپنی ثالثی اور طاقت دکھائی۔ مصر کو بھی سیاسی اور معاشی فوائد ملے۔

نقصان کس کا؟ فلسطینیوں کا، جنہیں عرب اتحاد کی کمزوری کی صورت میں تنہائی ملی۔ عرب دنیا مزید تقسیم ہو گئی۔

پاکستان میں اسلامائزیشن 

1979 ہی وہ سال تھا جب جنرل ضیاء الحق نے اسلام کے نام پر سیاسی اور قانونی تبدیلیوں کا آغاز کیا۔ حدود آرڈیننس آئے، مدارس کا جال بچھا، افغان جہاد میں شمولیت نے پاکستان کی مذہبی اور سیاسی شناخت ہی بدل ڈالی۔

فائدہ کس کو ہوا؟ ضیاء حکومت کو، جو مذہب کی آڑ میں اپنی حکومت مضبوط کرتی رہی۔ مذہبی جماعتوں اور شدت پسند گروپوں کو، جو آگے چل کر خودمختار اور بااثر ہو گئے۔

نقصان کس کا ہوا؟ پاکستانی عوام کا، جنہیں انتہاپسندی، فرقہ واریت اور عدم برداشت کے تحفے میں ملا۔

چین کی معاشی اصلاحات 

1979 میں چین نے اپنی معیشت کے دروازے دنیا کے لیے کھول دیے۔ اس ایک فیصلے نے نہ صرف چین بلکہ پورے ایشیا میں معاشی توازن بدل دیا۔

فائدہ کس کا؟ چین کا، جو چند دہائیوں میں دنیا کی دوسری بڑی معیشت بن گیا۔ مغربی کمپنیوں کا، جنہیں سستی افرادی قوت ملی۔

نقصان کس کا؟ ایشیا میں روایتی صنعتی ممالک جیسے جاپان اور مغرب کے کچھ صنعتی شعبوں کا، جو چین کی مسابقت سے متاثر ہوئے۔

انیس سو اناسی کے بعد مشرق وسطیٰ میں انقلاب، جنگ، معاہدے اور پراکسی لڑائیاں بڑھتی گئیں۔

آج ایران اور اسرائیل  کی کشمکش، فلسطینیوں کی حالت، افغانستان کی بدحالی، پاکستان میں انتہاپسندی، چین کی معیشت اور عالمی سیاست کے کئی بحران اسی ایک سال کی پیداوار ہیں۔

نقاب اُتر چکے ہیں

نقاب اُتر چکے ہیں

دنیا دہائیوں سے جمہوریت، انسانی برابری، آزادیِ اظہار اور سچ کی مالا جپ رہی ہے۔ بڑے بڑے عالمی فورمز، اقوامِ متحدہ کی میٹنگز، بین الاقوامی سربراہ کانفرنسوں اور انسانی حقوق کے سیمینارز میں خوبصورت الفاظ کی برسات ہوتی ہے۔ مگر جب زمینی حقائق، تاریخی پس منظر اور موجودہ عالمی حالات کو کھول کر دیکھیں تو اندازہ ہوتا ہے کہ دنیا کا یہ نظام اب کسی ایماندار میزان کی طرح نہیں، بلکہ ایسا ترازو بن چکا ہے جس میں ایک پلڑے میں طاقت، مفادات اور منافقت کا بوجھ مسلسل ڈالا جاتا ہے، اور دوسرے پلڑے میں آزادیِ اظہار، جمہوریت اور انسانی حقوق کے الفاظ رکھ کرترازو کے دونوں پلڑوں کو برابر دکھایا جاتا ہے 

آج اگر کوئی صحافی، کوئی لکھاری یا عام شہری اس منافقت پر سوال اٹھائے تو اس کے حصے میں دھمکیاں، الزامات یا خاموش موت آتی ہے۔ ہم سب نے سنا کہ دنیا کی طاقتور ترین ریاست کا سربراہ ایک صحافی کے لیے کہتا ہے کہ "اسے کتے کی طرح رگید کر نکالو"۔ افسوس کی بات یہ نہیں کہ یہ الفاظ کہے گئے، افسوس کی بات یہ ہے کہ دنیا نے خاموشی سے یہ الفاظ سن بھی لیے اور نگل بھی لیے۔

ایران کی مثال ہمارے سامنے ہے۔ ایک خودمختار ملک، جس نے بارہا اعلان کیا کہ وہ ایٹمی ہتھیار نہیں بنانا چاہتا، اس نے اپنے ایٹمی پروگرام کو کھول کر دنیا کو دکھایا، معائنہ کاروں کو بلایا، رپورٹس پیش کیں، لیکن اس سب کے باوجود، طاقتوروں نے اس کے سائنسدانوں اور قیادت کو چن چن کر قتل کیا، پابندیاں لگائیں، اور دنیا کو باور کروایا کہ ایران عالمی امن کے لیے خطرہ ہے۔

دوسری طرف اسرائیل کھڑا ہے۔ ایٹمی ہتھیاروں سے لیس، جس نے کبھی کسی بین الاقوامی معاہدے پر دستخط کرنا گوارا نہیں کیا۔ اُس کی بستیوں کی توسیع، فلسطینی زمینوں پر قبضہ، معصوم بچوں کی شہادتیں، نسل کشی، سب کچھ کھلی آنکھوں کے سامنے ہو رہا ہے، مگر نہ کوئی سوال، نہ کوئی مذمت۔ مغربی میڈیا اور عالمی طاقتیں صرف خاموش تماشائی نہیں، بلکہ اس ظلم کی سیاسی اور سفارتی ڈھال بنے ہوئے ہیں۔

فلسطین کے علاوہ کشمیر کی صورتحال کسی سے ڈھکی چھپی نہیں۔ اقوامِ متحدہ کی رپورٹس کھلے عام کہہ چکی ہیں کہ وہاں انسانی حقوق کی خلاف ورزیاں ہو رہی ہیں، مگر مغربی میڈیا کا کمال دیکھیے کہ وہ بھارت کو آج بھی "دنیا کی سب سے بڑی جمہوریت" کہنے سے باز نہیں آتا، حالانکہ صحافت کی آزادی کا حال یہ ہے کہ بھارت پریس فریڈم انڈیکس میں 161ویں نمبر پر کھڑا ہے۔

ایران اور اسرائیل کی حالیہ کشیدگی میں بھی دوہرے معیار کا یہ کھیل کھل کر سامنے آ گیا۔ اسرائیل کے حملوں کو "دفاع" جبکہ ایران کی مزاحمت کو "جارحیت" بنا کر پیش کیا گیا، حالانکہ ایران نے جنگی حالات میں بھی میڈیا پر مکمل قدغن نہیں لگائی، عوام کو اظہارِ رائے کی محدود مگر واضح گنجائش دی، جو خود مغربی دعووں پر سوالیہ نشان ہے۔

سچ یہ ہے کہ آزادیِ اظہار، جمہوریت اور انسانی حقوق کا کھیل صرف طاقتوروں کے مفادات تک محدود ہو چکا ہے۔ صحافیوں کی زندگیاں خطرے میں ہیں، سچ لکھنے والوں کو قتل یا جیل میں ڈالا جا رہا ہے، مگر چونکہ یہ سب اُن ممالک میں ہو رہا ہے جو مغربی اتحادی ہیں، اس لیے دنیا کو نظر نہیں آتا۔

سوچ کا فرق

دبئی میں برج خلیفہ دنیا کی بلند ترین عمارت تھی اب سعودی عرب میں دنیا کی سب سے اونچی عمارت بنانے کی بات ہورہی ہے۔

دوبئی میں ایسی عمارتیں بن رہی ہیں جن کی قیمت چھ ملین ڈالر تک ہے ان میں چاندی اور سونے کے نلکے اور ہیرے لگے ہیں، لباس کو چھوڑیں صرف عطر کی ایک بوتل ملین ڈالر میں بکتی ہے۔ کسی کی چھت پر ہیلی پیڈ ہے، تو کسی کے گیراج میں رولز رائس کی قطاریں کھڑی ہیں۔ قطر سے بحرین اور ریاض سے ابوظہبی تک، تعمیرات کی چمک دمک اور شاہانہ طرزِ زندگی دنیا کو دکھائی دیتی ہے۔ قاہرہ اور اسلام آباد بھی پیچھے نہیں ہیں ۔

اب ذرا مغرب کی طرف نگاہ ڈالیں۔ برطانیہ کے وزیر اعظم کی رہائش گاہ دس ڈاؤننگ اسٹریٹ، جو باہر سے دیکھیں تو لندن کے عام مکانوں میں گم ہو جاتی ہے۔ جرمنی کی سابق چانسلر اینگیلا مرکل کا معمولی فلیٹ اور ان کا پبلک ٹرین پر سفر معمول رہا۔ امریکہ میں دنیا کے امیر ترین افراد، جیسے مارک زکربرگ یا ایلون مسک، اکثر سادہ زندگی گزارتے ہیں اور اپنی دولت تحقیق، خلائی پروگرامز اور نئی ٹیکنالوجی پر لگا دیتے ہیں۔ ان کے ملکوں میں نہ سونے کے نلکے عام ہیں، نہ ہر عمارت محل جیسی۔ لیکن علم، سائنس، ٹیکنالوجی اور دفاع میں وہ دنیا کی صفِ اول میں ہیں۔

یہ فرق راتوں رات پیدا نہیں ہوا۔ یورپ کی تاریخ پر نظر دوڑائیں تو کبھی وہ بھی جہالت، تعصب اور خانہ جنگیوں میں ڈوبا ہوا تھا۔ قرونِ وسطیٰ میں ان کے چرچ اندھی عقیدت کے مرکز تھے، علم و سائنس کو کفر سمجھا جاتا تھا، اور معاشرے تاریکی میں ڈوبے ہوئے تھے۔

اسی دور میں مسلمان دنیا جگمگا رہی تھی۔ بغداد کی درسگاہیں، دمشق کی یونیورسٹیاں، قاہرہ کی لائبریریاں، اندلس کی درس و تدریس، اور خلافت عثمانیہ کی طاقت و تنظیم، دنیا بھر میں مسلمانوں کی علمی، سائنسی اور تہذیبی برتری کا نشان تھیں۔

پھر ہم نے علم چھوڑا، تحقیق بھلا دی، فرقہ واریت اور لسانیت میں الجھ گئے۔

ہم نے وہی غلطیاں دہرائیں جو یورپ نے قرونِ وسطیٰ میں کی تھیں۔

نتیجہ یہ نکلا کہ انیس سو اٹھارہ میں شام اور بغداد بکھر گئے۔ انیس سو انیس میں مصر غیرملکی تسلط کا شکار ہوا۔ انیس سو چوبیس میں خلافت عثمانیہ ختم کر دی گئی۔

وقت کی بلند ترین عمارت برج خلیفہ، پر تقریباً ڈیڑھ ارب ڈالر خرچ ہوئےتھے

امریکہ کا صرف ایک بی ٹو اسٹیلتھ بمبار طیارہ، دو ارب دس کروڑ میں بنا۔

اسرائیل، جس کا قیام انیس سو اڑتالیس میں ہوا، سائنس، زراعت، دفاع اور ٹیکنالوجی میں دنیا سے آگے نکل چکا ہے۔

ان میں اور ہم میں فرق کیا ہے ؟

وہ لیبارٹریاں بناتے ہیں، ہم محل۔ وہ سائنسدان پیدا کرتے ہیں، ہم کلرک

وہ مستقبل کی منصوبہ بندی کرتے ہیں، ہم ماضی پر فخر۔

خدا نے آج تک اس قوم کی حالت نہیں بدلی

نہ ہو جس کو خیال آپ اپنی حالت کے بدلنے کا

موساد اور را کی ملی بھگت

 

ایرانی انٹیلی جنس نظام کو دنیا میں ایک سخت گیر اور فعال نیٹ ورک سمجھا جاتا رہا ہے، مگر حالیہ برسوں میں ایسے واقعات سامنے آئے ہیں جنہوں نے اس ساکھ پر گہرے سوالات اٹھا دیے ہیں۔ اب یہ بات کوئی راز نہیں رہی کہ اسرائیلی خفیہ ایجنسی موساد اور بھارتی ایجنسی را، ایران کے دل میں گھس چکی ہیں اور بظاہر ناقابلِ رسائی سمجھے جانے والے اداروں کی دیواریں لرز چکی ہیں۔

حالیہ انکشافات کے مطابق، اسرائیل نے ایرانی ایئر فورس کی اعلیٰ قیادت کو ایک ہی وقت میں نشانہ بنایا، اور اس کارروائی میں سب سے خوفناک پہلو یہ تھا کہ موساد کو ایرانی افسروں کی میٹنگ کی درست مدت اور مقام کی مکمل معلومات حاصل تھیں۔ اس حد تک رسائی، کسی عام انٹیلی جنس کارنامے سے بڑھ کر، ایران کے داخلی نظام میں موجود دراڑوں کی عکاسی ہے۔

یہ واحد واقعہ نہیں۔ واشنگٹن پوسٹ میں شائع ہونے والی رپورٹ کے مطابق، ایک اسرائیلی خفیہ افسر کی جانب سے براہِ راست ایک ایرانی جنرل کو فون کر کے دھمکیاں دینا اور اس گفتگو کی آڈیو کا عالمی میڈیا میں آ جانا، اس بات کا ثبوت ہے کہ ایران کی اعلیٰ عسکری قیادت کے ذاتی رابطہ نمبرز تک موساد کی رسائی ہے۔ حیرت اس بات پر نہیں کہ موساد ایسا کرنے کی صلاحیت رکھتی ہے، بلکہ تشویش اس بات پر ہے کہ ایران کا دفاعی اور انٹیلی جنس نیٹ ورک اس سب کو روکنے میں مکمل ناکام نظر آ رہا ہے۔

اگر ہم اس تمام صورتحال کی تہہ میں جائیں تو ایک اور حقیقت بھی سامنے آتی ہے جسے ایران کے حکام یا میڈیا زیادہ اجاگر نہیں کرتے، اور وہ ہے بھارت کی خفیہ ایجنسی "را" کا اس ساری کہانی میں کردار۔ چاہ بہار بندرگاہ پر بھارتی موجودگی اور اس کے خفیہ مراکز اب کوئی ڈھکی چھپی بات نہیں۔ اطلاعات یہی ہیں کہ را، موساد کو مکمل معلومات اور زمینی مدد فراہم کرتی ہے۔ بلوچ علیحدگی پسند گروپ، افغان دہشتگرد عناصر اور خطے میں موجود دیگر مخالفین کو بھی اس نیٹ ورک کا حصہ بنایا گیا ہے تاکہ ایران کو اندر سے کمزور کیا جا سکے۔

اس تمام پس منظر میں ایران کے نیوکلیئر سائنسدانوں کی ٹارگٹ کلنگ اور حساس فوجی ٹھکانوں پر حملے، محض اتفاق نہیں، بلکہ دشمن کی سوچی سمجھی حکمتِ عملی کا حصہ ہیں۔ اسرائیل اور بھارت کا گٹھ جوڑ اس وقت ایران کے لیے سب سے بڑا خفیہ خطرہ بن چکا ہے، جس سے صرف طاقتور بیانات، انقلابی نعروں یا بیرونی الزامات کے ذریعے بچا نہیں جا سکتا۔

حقیقت یہی ہے کہ ایران کو اب اپنی انٹیلی جنس مشینری میں بنیادی اصلاحات، داخلی صفائی، ٹیکنالوجیکل بہتری  اور قومی سلامتی کے ڈھانچے کو جدید خطوط پر استوار کرنے کے ساتھ ساتھ دوست نما دشمنوں سے بھی ہوشسیار رہنا ہو گا۔